نطحة ف الواد
النغزة الخامسة
جوع كلبك يتبعك
الا جهل راه يعظك
هي علكة مفرخة ف الجلد
قرصة مسمومة ما لها حد
تشرب الدم و الريق
الروح تطلع و النفس تضيق
هذا مسمار مغروس ف اللسان
يغبر ف السكات،و ف الكلام يبان
كل حرف منطوق ب صداع
و كل جرح ف الكلام يوساع
هذا شوك القنفود...
مسمر ف الجلود
البركة معيوبة
و المشية محسوبة
الروح معلقة ف شريط
كله عقادي كله ربيط
كل عقدة ب نخصة
و كل ربطة بقرصة
و الدنيا ضركة كلها شوك
القلب مجراب و اللسان محسوك
الا نطق ب الحق يتقطع
و الا شكى،شكواه ما يتسمع.
هجم النهار ع الليل
و ضو الشمس ع الفتيل
و الظلمة لبست الحجاب
حست ب الشعا كيطل ف الباب
الظلمة ل النفس خلوة
الظلمة ل الروح نشوة
فيها يذوب زواقها
شرها و نفاقها
الذات تفسخ لباسها
يطير الشر ف نعاسها
تصير حمامة ...
الريش محبة و الجنح سميح
النفس حوامة...
تزول النفخة و الزواق يطيح
و النهار قهار
بنادمه حقار
يلبس توب...
مخيط ب شر افعاله
الظلم فيه ينوب
على خير اعماله
تقاضى الليل ...
و تقاضى كلامه
رجع الخليل...
ل عش احلامه
مهمومة و باركة مطوية
من قرحة احزانها مكوية
الهم ف العين محفور
و الراس ب الخوف يفور
بركت و العرا غطاها
و الهم يعوم ف سماها
الخوف ف الراس يخطط
و العين ف الدموع ما تفرط
وقفت و لاحت حملها عليه
حس ب الدنيا كلها بين يديه
الذات ع الذات...
و القبلة دارت ما بغات
رسمها جمرة حمرا
غاب الكلام و الهضرة
ملي الذات تنطق ب غرامها
يذوب الحرف ف كلامها
يولي الكلام شهقة محمومة
و الحروف ب العناق نشوة مرسومة
سرحت ف الخيال
و العين حاضنة شفارها
العقل يسال
تظلام الحلمة ف نهارها
قالت كلام ملحف ب ضبابة
تحرك اللسان و كله سحابة
الصورة ف الراس مهراز
و اللسان بخيل معكاز:
- انت...الظلام...الحلم
نبتة...الغرام...الدم
هي... الراس... الغم
كية...الباس ...الهم
- لسانك مقسوم عوده
جبيرة من النعاس تفيده
قلة النعاس
تهرس الراس
توسدت دراع الحبيب
و غرقت ف واد احلامها
طريق تدي و الاخرى تجيب
و غابت الصورة ف منامها
و بقات عينه مشمرة شفارها
و النعاس ف العين زكروم
هم الدنيا من احزان اخبارها
الا كان الهم ف القلب يدوم
غرق ف حبال افكاره
و النعاس حجرة ف شفاره
قاوم ما قدر
حاول ما صبر
طاح طيحة البطانة
العيا فراش و عبانة
دخله الحلم من وذنيه
سمع صوت و كلام عليه:
- الدنيا معاك لابسة توب كحل
و رجلك غارقة ف غيسها
تهز رجل و الاخرى توحل
عدي يا ودي و زيد سايسها
هي دنيا و مهبولة
بنادم فيها مسلوب
نفوسهم باردة مقتولة
الجوع الذل و الكروب
ناسهم ب الخوف مذلولة
العدل وسطهم منكوب
هي غابة و مجهولة
الضعيف معلق مصلوب
الحق كلمة مقتولة
و العدل بينهم معطوب
الفقيه لي نتسناوا شفاعته
خالف شرع الله و فرضه
شطح و تحزم ب عمامته
وذن ف الناس بلا وضو
ذاك الكره الساكن قلبك
ولد ف عينيك الجلالة
خلاّك تفسخ جلدك
تشوفها عوجة ب جهالة
- هذاك حقي و حق الفلاح
و كل خماس مظلوم و سراح
الحق يتخاذ ...ما يتعطى
الا كانت العباد...عايشة زلطة
الكلب الا جاع... ما يتبع مولاه
و الحق الا ضاع... يموت و يلقاه.
و مشات سفينة احلامه... ف طريق
مرة سالك باقدامه...مرة غريق
و ف غرق المنام
سمع كلام...:
- دارت علي و عليك الدورة...يا ولد لالة
فعلتنا باتت مشهورة...صعابت الحالة
حمان يا مراية العذاب
يا ذاك الرفيق...
باعوك و باعوني الصحاب
يا ذاك الصديق
- هذه دقة ف القلب
ماشي ف الباب
الراس ب الهم تغلب
و تكوى ب العذاب
و قف و سرح النظر
و الدهشة ظلام قبر
تجول و طاف...
تهول و خاف...
آش الحل ف هذا العملة
آش يدير ف هذا الحصلة
قسم الهم مع الصحاب
و قال نتعاونوا عليه
سباب القهرة و العذاب
يد وحدة ع الهم و عليه
خانوا الصحاب ...
و باعوا العشرة
مضاوا ليه الناب
و زاد ف الحقرة
و بقيت وحدك يا هذاك
ف هذا الزوبية غريق
طارت الصحبة من حداك
و ظلامت ف عينيك الطريق
الراس ب الخوف مدزوز
و القلب ب الهم منغوز
و الضبرة كلها حريق
و الصحبة لاش تليق
و الصديق ل الصديق عكاز
ما يخون ب دق المهراز.
تحجبت البنية
و غطات حروفها
تشمرت للكية
حتى حد ما يشوفها
شافت الحبيب...
محزم ب همومه
الوجه غريب ...
النفس تلومه
شبكت ايديها ف ايديه
القرحة محفورة ف عينيه:
- الواد نقطعوه ملزومين
وف الجبل رقادنا الليلة
ب خيوط الظلمة مستورين
نهاجروا الدوار غير ب الحيلة
قالت كلامها ...
و الكلام واثقة فيه
فكرت ف احلامها
تموت و ما تفرط فيه
- الجبل غلب الرجال
و انت ولية...
هو بحر من الاهوال
و انت فتية
توكلي ع الخالق
و ل الزاوية دخلي
راه للخير مصادق
تقدمي لا تولي
ملي تغيب الشمس
و يطلق الليل سواده
يتقطع ف الدوار الحس
و تعوم الناس ف رقاده
نسرج كتافي لك
و نبعدوا بعيد...
لظلم الباشا ما نخليك
القمع و الحديد
شافت فيه شوفة الفراق
و الدمعة سابقة النظرة
القلب ينوح من الاعماق
تقاضى الكلام و الهضرة
الخطوة ثقيلة...
و القلب نادر من الهموم
النفس عليلة...
ع الفرح لي ما يدوم
العين شمعة ف الريح
دموعها ب الدم تسيح.
دخلت للضريح مهمومة
القلب ب الغم مسكون
من دفا حبيبها محرومة
و زواجها ميت مدفون.
فكر ف شلة طرقان
و حتى طريق ما خرجاته
طريق الهم و المحان
و النفس اللايمة ما هناته :
- الجبل رحمة لكل مظلوم
الا كان ف عين ناسه ضعيف
محقور ف الوطى معدوم
متبوع ب كلام مضى من السيف
سيدنا محمد اختاره
و اختار الصحرا
توكل و ادخل لغاره
و اعطى العبرة
و لي نجا رفيقه و نجاه
قادر ينجيني و ينجيك
الرحمة ساكنة ف سماه
و نوره يحميني و يحميك.
الرجل ف جنب الواد
و العين تفكر ف الجبل و طلوعه
توكلوا على رب العباد
و الواد حل فمه و بين جوعه
علي مفتاح
ديوان زجل
الحقرة
publié par miftah à
10/05/2006 10:56:00 AM
|
1 commentaires
